Schwäbischer Dialekt

Ein Werk von Siegfried Wiedemann mit Anleihen bei alten Autoren.

Wer bei os koi Schwäbisch ka, der isch oifach b‘schissa dra. Ond‘s isch au so, des muaß ma saga, denn b‘sonders ältre Leit härsch klaga, daß dia no Wörter hen viel kennt, dia heit fascht ausg‘schtorba send. A paar davo dia sag i jetzt, komm machat mit, ‘s wird Schwäbisch g‘schwätzt. A leeras G‘schwätz isch a Gebabbel, langsch en da Schritt, na langsch an d' Kraddl. Ein Bettbezug des isch a Ziach, a ganz durchtrieb‘ner Mensch a Siach. A Blutwurst isch a Blonza, dia Reiche hoißt ma Bonza. Amtsdiener hoißat bei os Bittl, zu Jacka secht ma bei os Kittl. A Holzwanne, des isch a Zuaber, ond Schnalla, des sen rechte Luader. A Breggale isch ein kleines Schtick, da Anka schneida duasch em G‘nick. Liegt‘s du kurz hin, sagat mir dosa, ond wenn wir zuhörn, dean mir losa. Holzschplitter hoißat mir en Schpreisa, mir sagat bamba des hoißt sch.... Müaßat mir pinkeln, dean mir bronza, mir schaffat langsam, dean et honza. Isch ebbas z'bschnodda, isch's z‘knapp, beim Karta willsch en guata Dapp. A Schtiege isch bei os a Trepp, zu domme Kerle sesch: du Depp. Des bescht vom Brot isch‘s Riabele, a kloiner Oimer s‘ Küabele. Geht einer schäps, dann geht er schief, isch einer tüchtig isch er wief. Zom Blutgefäß, do secht mr Oadr, ond eine Blase isch a Bloader. Zom Klebstoff secht ma bei os Bäpp, dr Josef isch bei os dr Sepp, Eicheln send bei os Oichala, riachsch noch Urin duasch soichala. A dicker Kopf des isch a Meckel, zum blöda Kerle sesch du Seggl, fettescht was ein, na duasch‘s eischmotza, hosch du en Rausch, ka‘s sei, muasch kotza. Mir dean em Bett an‘s Weible schlupfa, ond schtatt heben dean mir lupfa, wenn du z‘viel trenksch, muasch öfters rolla, na hosch an Rausch ond schöana Bolla. Des Brot des kaufat mir beim Becka, mir hen koi Brötchen, mir hen Wecka, mir dean et bremsa – mir dean migga, ond Fuaßball schpiela des hoißt kicka. Ist einer nackt dann ist er blutt, a liedrichs Weib – des isch a Schlutt. Wertloses Zeug des isch a Glomb, zom bsoffna Ma da sesch älls Lomp. Mit kloine Kender duat ma buabla, ond en dr Nas do derfsch net gruabla. Hosch Schtreit mit oim, na duasch du zerfa, zu so was brausch du guate Nerva. Mir hen koin Traktor, hen ‘n Schlepper, ond Hausschuah hoißat bei ons Däpper. A giftig‘s Weibsbild duat oft befzga, ond Wespen hoißat bei ons Wefzga. Es gäb no so viel Ausdrück, Leit, i moin jedoch es langt fir heit ...

Mehr zum Thema

Zurück zur Übersicht: Ostalbkreis

Kommentare